Un émulo pacífico de Breogán, a alma de Galicia en Cuba, José Fontenla Leal (Ferrol, 1864 - A Habana, 1919), home autodidacta, feito a si mesmo, con poucos estudos, mais cunha intelixencia innata que lle permitía convencer e aglutinar, tiña unha idea clara e unha vontade de ferro que converteu o amor á súa terra en feitos duradeiros. Bandeira, Himno, Academia débense, en boa medida, á súa iniciativa persoal, conseguindo limar asperezas e xuntar vontades, en proveito da súa terra. Esta biografía exhuma documentos inéditos, como o prototipo da primeira bandeira galega, aborda as relacións que mantivo con persoeiros como Murguía, Curros Enríquez, Cabanillas e Villar Ponte, e achega datos relevantes sobre un personaxe que hai ben tempo merecía ser estudado.
